Nazioarteko Estropaden harira, askotariko jardurak izango dira gaur egun osoan zehar Orion. Goizean, esaterako, Mutiozabal ontziola bisitatu ahal izan dute herritarrek, eta arotzak zuzenean ikusi lanean.
Eguerdi parterako, jendetza bildu da plazan. Arkuperen Erruleta Solidarioan hasterako ilara luzea osatu dute bertaratutakoek, eta merkatarien eta ostalarien elkartearen eskutik, zenbait abantaila eskuratzeko aukera izan dute oriotarrek.
Parrillak piztu dituzte ordurako. Berdela parrillan erreta dastatu ahal izan dute, garagardoaz lagundurik. Arratsaldean ere ez da festa girorik faltako: 16:30ean hasiko dute estropada errioan; jarraian, Jainekin txaranga arituko da kalez kale; 19:30ean sari banaketa eta Javier Puertasi eta Dionisio Redondori omenaldia egingo diote plazan; eta, eguna behar bezala borobiltzeko, DJ Bonen emanaldia izango da plazan.