Getariako Eskubide Sozialen Kartak antolatu du; bat egin du Alternatiben Herria dinamikarekin.
Getariako Eskubide Sozialen Kartak antolatu du energia eredu iraunkorraren inguruko hitzaldia. (Hitza)
Getariako Eskubide Sozialen Kartak hitzaldi bat antolatu du biharko. Alternatiben Herria dinamikaren barruan, Goiener kooperatibaren inguruko hitzaldia eskainiko du 19:00etan Alondegian. Goienerreko bazkide boluntario Alex Lopez zarauztarrak energia eredu berria izango du hizpide.
«%100 jatorri berriztagarria duen energia merkaturatzen dugu»
ALEX LOPEZ Goienerreko bazkidea
Zer da Goiener?
Euskal energia kooperatiba herritarra da, irabazi asmorik gabekoa. Hala, 2013ko urritik argindarra kontratatu dezakete gure bazkideek.
Zein da kooperatiba horren helburua?
Gure eginkizuna da herritarren eskaera bideratzea, energiaren kontrola berreskuratzeko eta iraunkor bihurtzeko. Azken finean, eredu energetikoaren aldaketa bultzatu nahi dugu; aldi berean, bazkideek bat egiten dute gure ekimenetan, eta tokiko ekonomia garatzen laguntzen dute. Hurbil gaude, eta hurbilak gara. %100 jatorri berriztagarria duen energia merkaturatzen dugu, eta jatorriaren berme ziurtagiria dugu, gainera. Jarduera horren bidez, errentagarritasun ekonomikoa ematen diogu kooperatibari; gainera, aukera ematen diegu kontsumitzaileei ahalegin txiki bat eginez eredu energetikoan aldaketa handia eragiteko.
Nola funtzionatzen duzue?
Kooperatiba herritarra garen aldetik, denen artean lan egin eta erabakitzen dugu, bazkide bat boto bat delako. Gure boluntarioak dira kooperatibako indarra, eta beren antolaketarako Goiener Elkartea sortu dugu. Irabazi asmorik gabeko elkartea da. Elkarteak boluntarioei babesa ematen die eta, aldi berean, kooperatiba ailegatu ezin daitekeen toki eta errekurtsoetara heldu daiteke. Gainera, gizarte mailako mugimendua gara, eta gizarte mailan energia arloan dauden arazoei aurre egiteko ere sortu dugu elkartea.
Zer eskaintzen die Goienerrek herritarrei?
Goiener ez da salneurri merkeenaren bila dabiltzanentzat. Herritarrak konfiantzazko enpresa etiko baten bila badabiltza, eta gainera bertako erabakietan parte hartu nahi badute, gurea izan daiteke aukera aproposa. Kooperatibarekin ordaintzen duten fakturaren parte bat bertako ekonomian geldituko da, eta horri esker gure inguruneko garapen ekonomikoa bultzatzen lagunduko dute: Euskal Herrian lanpostuak sortuz, eredu energetikoaren aldaketa bat modu aktiboan sustatuz eta ingurugiroa babestuz.
Nondik dator zuen energia?
Gure helburuetako bat da geure energia sortzea eta energia hori gure bazkideek kontsumitzea, beti ere kontsumo arduratsu bat bultzatuz. Oraindik ez gara hasi energia ekoizten, baina aurten hastea espero dugu. Orain merkatu zentralean erosten dugu, eta jatorri berriztagarrikoa dela ziurtatzen diegu bazkideei.
