Gaurtik aurrera, inauteriek umorez eta kolorez girotuko dute eskualdea, eta ikuskizunek eta mozorro lehiaketek ez dute hutsik egingo. Antolatzaileek prest dituzte egitarauak.
Inauterien atarian, bat baino gehiago arituko dira mozorroari azken ukituak ematen, arropa zaharrik ba al dagoen armairuak goitik behera miatzen edota ondoko saltokian azken orduan otutako jantziren bat erosten. Ate joka dira inauteriak, eta beste urte batez, musikak eta umoreak eztanda egingo dute herriko txokoak kolorez janzteko. Eskualdean ere ez dute hutsik egingo ospakizunek, erakundeek, ikastetxeek zein eragileek prest baitituzte egitarauak; herritarrak, berriz, pronto daude irudimenarekin dantza egiteko.
Eskualdeko herri guztietan ohiko ekitaldiak egingo dituzte gaurtik datorren asteazkenera bitartean, baina hainbat lekutan izango da berrikuntzarik: Zarautzen, esaterako, aurten sei eguneko egitaraua prestatu du udalak, “inoizko aberatsena”. Aurrenekoz, Jalgi dantza taldeak Galtxagorrien jaitsiera izeneko kalejira egingo du gaur, euskal mitologia ardatz hartuta. Dena den, bihar izango da inauterietako jai egun nagusia, eta Koxme baleak txupinazoa botako du Modelo aretoko balkoitik. Arratsaldean, Inauterietako IV. Konpartsa egingo dute 180 lagun inguruk, Eurovision jaialdia gaitzat hartuta.
Orion ere bihar ospatuko dituzte inauteriak, baina aurten beste egitasmo batekin uztartuko dituzte festak: Arraun Egunarekin. Hori hala, bi egitasmoak bateratu eta arraunak zein mozorroek hartuko dute herria.
Getarian, berriz, gaur izango dute egun nagusia, eta orduan banatuko dituzte, esaterako, Inauterietako Kartel Lehiaketako sariak. 32 lan aurkeztu dituzte lehiaketara, eta epaimahaiak asteartean erabaki zituen kategoria bakoitzeko sarituak: 2-5 urte bitartekoen artean, Karen Esnal Gasteiz da irabazlea; LH1-LH3 mailan, Lur Elorrieta Alberdi; LH4-LH6 mailan, Irati Vicente Ezenarro; DBHkoen artean, Estanix Irazu Larrazabal; eta helduen kategorian, Asier Illarramendi Etxabe. Horrez gain, tabernariek, bihar, 60 euroko bonoak banatuko dituzte kontsumitzaileen artean, eta etzi, eguerdiko txikiteoan egingo dute zozketa.
Mozorro onenentzat sariak
Festaz, ikuskizunez eta desfileez haratago, mozorro lehiaketek ere izango dute tartea datozen egunetan Urola Kostan. Zumaian, esaterako, hiru lehiaketa prestatu dituzte biharko: 18:00etan, umeen lehiaketa hasiko da, eta izen-ematea 17:00etan zabalduko dute, plazan. Helduen eta gazteen mozorro lehiaketak ere egingo dituzte: 19:30etik 20:30era, epaileak herrigunean ibiliko dira mozorroak ikusten, eta banakako edo bikoteei eta taldeei emango dizkiete sariak. 18:30etik 21:00etara, berriz, herritarrei sariak emango dizkiete Argazki Txokoan.
Azkoitian, bestalde, gaur 12 eta 17 urte bitarteko gazteek egingo dute mozorro lehiaketa, Elkargunean. Bihar, berriz, 16 urtetik gorakoen txanda izango da, eta horiek gaur izango dute lehian izena emateko azken eguna. Lehiaketan parte hartzen duten taldeek eta norbanakoek 19:00etatik 20:30era artean eliza ataritik pasatu beharko dute, epaimahaiak orduan egingo baitu mozorroen balorazioa. Tabernetara, berriz, 20:30etik aurrera joango dira epaimahaikideak.
Azpeitian, hementxen dala…
Ate joka dira karnabalak Azpeitian ere, eta nabaritzen da bai giroan, bai herritarren artean. Gaur hasiko dira ospakizunekin herriko ikastetxeetako haurrak; Karmelo Etxegarai Ikastolako eta Iraurgi Ikastetxeko ikasleek ikastetxeetan egingo dituzte inauterien bueltako ekitaldiak. Aldiz, Azpeitiko Ikastola Ikasberriko kideek euskal inauterien kalejira eta jaialdia eskainiko dute Alde Zaharrean. 18:30ean abiatuko da festa, Olazko Andre Mariaren plazatik.
Biharkoa azken prestaketa lanak egiteko eta atseden hartzeko eguna izango da herrian, eta igandean dotore jantzita esnatuko da eguna. Iragarpenen arabera, eguraldia ere halakoxea izango da, eta ez da festa girorik faltako egun osoan zehar.
Jaietarako ohiko egitaraua prestatu du udalak aurten ere. Dena den, izango da berrikuntzarik. Beharbada, esanguratsuena mozorro lehiaketaren ordutegi aldaketa da. Hain zuzen ere, aurreko urteetan baino ordu eta laurden lehenago egingo dute: 00:15ean. Iaz arte 01:30ean egin zuten sari banaketa udaletxean. Guztira, zazpi sari banatuko dituzte: banakakoak, taldekakoak eta karnabal giroko tabernarena.
Indarkeria matxista salatzeko eta kontsultak egiteko arreta telefono zerbitzua ere eskainiko dute Azpeitiko Udalak eta Azpeitiko Emakumeen Mahaiak karnabaletan. Elegante Egunean eta Astelehen Karnabalean, 20:00etatik 08:00etara bitartean eskainiko dute telefono zerbitzua. Jaietan eraso matxistarik jazoko balitz, 688 75 10 00 telefono zenbakira deitu ahal izango dute herritarrek, eta horiek informazioa, aholkularitza nahiz aurrez aurreko arreta eta laguntza jasoko lituzkete.
Bestalde, indarkeria matxistarik gabeko gunea jarriko dute Plaza Txikian. Jai Karnabalean 19:30etik 01:00etara izango da gunea, eta Astelehen Karnabalean, 19:30etik 06:00etara.
EGITARAUAK HERRIZ HERRI:
AIA
- Otsailak 21, ostirala.
– 14:30-16:00. Lardizabal ikastetxeko ikasleen ikuskizuna, dema plazan.AIZARNAZABAL
- Otsailak 21, ostirala.
– 17:00. Guraso Elkartearen eskutik, txokolatada.
– 18:00. Kalejira, Musika Eskolako trikitilariekin.
– 18:30. Alaitsu dantza taldearen emanaldia.AZKOITIA
- Otsailak 21, ostirala
– 16:00. Ikastetxeetako umeen kalejira.
– 17:00. Umeentzako merienda, herriko plazan.
– Jarraian, Umeentzako dantzaldia Oihan Vegarekin, plazan.
– 21:30-23:30. 12-17 urte bitarteko gazteentzat mozorro lehiaketa eta Disko Festa egingo dituzte DJ Xabi Festen eskutik. Sariak egongo dira.
- Otsailak 22, larunbata.
– 12:00. Txalkor txistulari taldearen kalejira.
– 12:30. Azkoitiko Musika Bandaren eta Bizkargi musika eskolako banda txikiaren kalejira, herrian zehar.
– 16:30-18:30. Urolatarrak txaranga, herriko kaleetan zehar.
– 18:30-19:45. Kantu Kolore haur berbena.
– 19:45-21:00. Ilargi Beltza taldearekin dantzaldia egingo dute, herriko plazan.
– 23:00. Ilargi Beltza taldearekin dantzaldia egingo dute, herriko plazan.
– 00:00. Mozorro lehiaketaren sari banaketa, herriko plazan.AZPEITIA
- Otsailak 23, igandea. Elegante Eguna.
– 09:00. Txistularien diana.
– 11:30. Bandaren eta gaiteroen diana.
– 11:30. Incansables txaranga.
– 12:00. Sokamuturra.
– 12:00. Imanol Elias sokamuturreko argazki lehiaketa.
– 12:30. Artzain-inudeen kalejira.
– 13:30. Presoen aldeko argazkia, plazan.
– 16:15. Zezenaren irteeraren aurreko doinuak, Plaza Txikian.
– 16:30. Sokamuturra.
– 19:00. Rock kalean elektrotxaranga.
– 19:30. Gau-Erdi txaranga.
- Otsailak 24, astelehena. Astelehen Karnabala.
– 11:00. Sokamutur txikia.
– 12:30. Umeen desfilea.
– 16:15. Zezenaren irteeraren aurreko doinuak, Plaza Txikian.
– 16:30. Sokamuturra.
– 17:00. Disko festa eta txokolatada, Azoka Plazan.
– 19:00. Brincadera taldea.
– 19:30. Banda eta Urolatarra txaranga.
– 23:00. Hemen gaude gu Egan taldearen emanaldia, kioskoan.
– 00:00. Los Pasai txaranga.
– 00:15. Mozorro lehiaketako sari banaketa, udaletxean.
– Ondoren, Perculights taldea.
- Otsailak 25, asteartea. Astearte Karnabala.
– 02:00. Los Pasai txaranga.
– 06:15. Goiz eresia, bandarekin.
– 06:45. Zezenaren irteeraren aurreko doinuak, Plaza txikian.
– 07:00. Sokamuturra.
– 12:00. Banda gaztearen kalejira.
– 16:15. Zezenaren irteeraren aurreko doinuak, Plaza Txikian.
– 16:30. Sokamuturra.
– 17:00. Hodei magoa, Azoka Plazan.
– 18:30. Irulitxa txaranga.
– 20:00. Suzko zezena.ERREZIL
- Otsailak 21, ostirala.
– Arratsaldean. San Martin herri eskolako ikasleen festa. Altxorraren bila jolasa egingo dute herrian zehar.GETARIA
- Otsailak 22, larunbata.
– 10:30etik aurrera, erakusleiho onenak aukeratuko dituzte.
– 12:00. Pote zomorro alaia, Jainekin txarangarekin.
– 17:30-19:00. Kolaxekin musika eta dantza, herriko plazan.
– 18:45. Kartel eta erakusleiho lehiaketako sari banaketa, herriko plazan. Horrez gain, 2020ko Karnabaleruena izendatuko dute.
– 19:00. Dantzaldi erraldoia, plazan.
– Jarraian, Jainekin txaranga, kalez kale.ORIO
- Otsailak 21, ostirala.
– 10:30. Zaragueta ikastetxeko ikasleen kalejira, herrian zehar.- Otsailak 22, larunbata.
– 12:00. Sugarri fanfarrea kalez kale.
– 12:00. Mozorroen kalejira, KTAtik aterata.
– 13:00. Photocalla Endaia plazan, Arkupek antolatuta.
– 13:00. Marmitako-errazioak (2 euro) eta txotxeko sagardoa (1,5 euro) banatuko ditu Ibai Ondo plazan Orioko Arraunketa Elkarteak.
– 14:15. Kalejira Endaia plazatik pilotalekura.
– 14:30. Inauteriko herri-bazkaria, pilotalekuan. Helduen menua 18 eurotan izango da, eta haurren menua 12 eurotan. Bazkaritarako txartelak salgai daude kultur etxean.
– 16:00. Oriaren Traineru Jaitsiera, errioan.
– 17:30. Mozorroen kalejira, pilotalekutik aterata.
– 17:30. Rockalean elektrotxaranga kalez kale.ZARAUTZ
- Otsailak 21, ostirala
– 18:30. Galtxagorrien jaitsiera musika eskolatik abiatuta, Jalgi dantza taldearen eta Zarautz TRIK taldearen eskutik.- Otsailak 22, larunbata.
– 12:00. Koxme baleak txupinazoa botako du Modeloko balkoitik, Joselontxos txarangak girotuta.
– 12:00-14:00. Joselontxos txaranga herriko kaleetan zehar, Alde Zaharretik abiatuta.
– 17:00. Mozorro festa eta merienda Ludotxo ludotekan. 9-11 urte arteko haurrentzat.
– 17:30. Inauterietako IV. Konpartsa: Eurovision, Alde Zaharrean. Euria eginez gero, etzi izango da, 13:00etan, toki berean.
– 18:00-20:30. Inauteri Jaia: DJ nerabeen emanaldiak eta mozorro lehiaketa (taldekoa, originalena eta #zuzeukiña), Zinema pilotalekuan. Gaia: Hippie unibertsoa. 12 eta 18 urte bitarteko nerabeentzat.
– 19:00. Dantzaldia Fan&Go taldearekin, Musika plazan.
– 19:00. Mozorro lehiaketan parte hartu nahi duten kuadrillen kalejira, Musika plazan. Parte hartzeko, aurrez izena eman behar da Turismo Bulegoan, edo egun berean, Euskalduna tabernan.
– 19:30. Kuadrillen mozorro lehiaketaren sari banaketa: lehen saria 250 euroko bonoa da, bigarrena 150 eurokoa eta hirugarrena 100 eurokoa. Bonoak Zurekin elkarteko tabernetan gastatzeko izango dira.
– 20:30. Mozorro dantza Udaberri tabernan.
– 21:30-00:30. Nerabeentzako festa DJ Lazekin, Zinema pilotalekuan.
– 23:00. Dantzaldia Fan&Go taldearekin, Musika plazan.- Otsailak 23, igandea.
– 11:00. Santa Ana egoitzako konpartsaren kalejira Alde Zaharrean. Euria eginez gero, egoitza barruan izango da.
– 12:00. Kalejira Alde Zaharretik abiatuta, buruhandiekin, erraldoiekin eta Mauxitxa txarangarekin.
– 17:00. Panpinen zirkua emanaldia, Musika plazan. Euria eginez gero, Zinema pilotalekuan izango da.
– 18:15. Txikidantz dantzaldia Musika plazan, Asier Burgeteren eskutik. Euria eginez gero, Zinema pilotalekuan izango da.- Otsailak 24, astelehena.
– 16:30-19:30. Koxme balearen lagun puzgarriekin haurrentzat parkea, Lege Zaharren Enparantzan. Euria eginez gero, Zinema pilotalekuan izango da.- Otsailak 25, asteartea.
– 11:30. Santa Ana egoitzako kideen eskutik, Sardinaren entierroa Lege Zaharren enparantzatik abiatuta, herriko kaleetan zehar. Euria eginez gero, Santa Ana egoitzan izango da.ZESTOA
- Otsailak 22, larunbata.
– 17:30. Umeen desfilerako izen-ematea, arkupeetan.
– 18:00. Umeen mozorro desfilea, udaletxeko arkupeetan. Gaztelekuak antolatuta.
– 20:00. DJ Davila, udaletxeko arkupeetan.
– 23:00. DJ Davila.- Otsailak 25, asteartea.
– 16:30. TXokolatada, plazako arkupeetan. Ekain guraso elkarteak antolatuta.
– Ondoren, Musika animazioa, arkupeetan. Ekain guraso elkarteak antolatuta.ZUMAIA
- Otsailak 21, ostirala
– Arratsaldean. Herriko ikastetxeetako haurren inauteri festa.
– 17:00. Ludotekako haurrentzat inauteri festa, Ludotekan.
– 18:30. Ubillosen hasita, Musika Eskola eta ZUMB-Musika bandaren inauteritako kalejira: Mexiko.
– Ondoren, Emanaldia Eusebio Gurrutxaga plazan.- Otsailak 22, larunbata.
– 12:00. Zumai txarangaren kalejira herriko kaleetan zehar.
– 12:30. Astindu dantza elkartearen dantza-kalejira, Eusebio Gurrutxagan.
– 17:00. Eusebio Gurrutxaga plazan inauteritako mozorro festa eta txokolatea banatuko dute mozorrotutakoen artean.
– 18:00. Haurren mozorro lehiaketa, plazan.
– 18:30. Kalejira Zumai txarangarekin, herriko kaleetan zehar.
– 18:30-21:00. Argazki Txokoa, Oxford aretoan.
– 22:30-01:30. Disko-festa mozorrotua, Kofradian.- Otsailak 23, igandea.
– 16:30. Zinema, Aita Marin.- Otsailak 24, astelehena.
– 15:00etan eta 17:30ean. Zumaienan, Pirritx, Porrotx eta Marimotots pailazoen ikuskizuna: Bizi Dantza.
– 18:00. LH 4-6 bitarteko haurrentzat inauteri festa, Ludotekan. Egitasmoa irekia da adin horretako haur guztientzat.
