Joan Mari Torrealdairen heriotzaren harira, Hekimen Euskal Hedabideen Elkarteak ondorengo idatzia helarazi du, eta Urola Kostako HITZAk bat egiten du.
Joan Mari Torrealdai, Martin Ugarte Kultur parkean (Gari Berasaluze) Joan Mari Torrealdai euskararen zein euskal kulturaren berreskurapen prozesuan bidegile garrantzitsua izan da. Ugariak eta askotarikoak izan dira bere ekarpenak, baina lerro hauen bidez eta Hekimen Euskal Hedabideen Elkartearen izenean euskarazko komunikabideen unibertsoari eta, oro har, euskal komunikazio esparruari egindakoa azpimarratu nahi dugu.
Ezaguna izan da ia mende erdiz Jakin aldizkarian egindako lana eta, nola ez, Euskaldunon Egunkaria argitaratzeko egindakoa. Euskarazko komunikabideen arteko elkarlana eta egituraketa bultzatzeko egindakoa agian ez da hain ezaguna baina horretan ere saiatu zen. Egiturak sortu, indartu eta mantentzea, hori zen bere jardunaren iparrorratza. Hekimeni dagokionean, hasitako bideari eutsiko diogu, bere gogoa gugan.
