Gaur goizean abiatu dute Mallorcan [Herrialde Katalanak] Heriotzari Bizia Ematen jaialdia, eta, horren barruan, eguerdian Hil aurretik nahi dut… horma aurkeztu dute Orion. “Heriotzaren gaiari ikusgarritasuna eman nahi diogu, gaia alderdi desberdinetatik lantzeko. Euskal Herrian ekimen ugari daude zentzu horretan, eta tokian tokiko eragileok ari gara egitasmoak antolatzen heriotza ikuspuntu desberdinetatik jorratzeko. Sareak sortzen ari gara, eta Heriotzari Bizia Ematen jaialdiaren barruan, jarri nahi izan dugu Hil aurretik nahi dut… horma, herritarrek beren hausnarketak adierazteko tartea izan dezaten”, azaldu du aurkezpenean Amaia Gozategik.
Antolatzaileek azaldu dutenez, ekimena New Orleansen [Ameriketako Estatu Batuetan] sortu zen artista urbano baten eskutik. Neska honi lagun bat hil zitzaion, eta heriotzaren gaiak sortzen zituen sentipenak adierazteko espazio bat sortu nahi izan zuen hirian”. Gaur egun, 70 herrialdetan dago martxan mugimendua, eta toki askotan mota honetako hormak finkoak dira. “Polita izango litzateke herri bakoitzak heriotzaren inguruan hausnartzeko gune bat izatea. Heriotza gai atsegina ez bada ere, denoi eragiten digulako”.
Zarautz Herri Zaintzailea elkarteko kide Iñaki Peñak adierazi duenez, gaiari ikusgarritasuna emateko aukera bikaina da horma. “Heriotzaren gaiaren inguruko hausnarketa nahiko minoritarioa da, ez du saltzen. Dena dela, uste dut ez dugula ezkutatu behar; aldarrikatu egin behar dugu, eta Hil aurretik nahi dut… horma horretarako aukera aproposa da”.
Heriotzari Bizia Ematen jaialdiaren barruan, bestalde, Zarauzko Memora Tanatoriora bisita antolatu dute astearterako; 16:30ean izango da. Ondoren, 17:15ean, Death Cafea egingo dute, Zarautz Herri Zaintzailearen eskutik. 19:00etan, berriz, zineforuma izango da; Los Demás Días filma ikusi eta zuzendariarekin streaming bidezko elkarrizketa egingo dute. Astearteko ekitaldietan parte hartzeko izena eman behar da aldez aurretik, 648-48 74 89 telefono zenbakira deituta edo dandovidaalamuerte@gmail.com helbidera idatzita.
Azkoitian eta Azpeitian ere bai
Azkoitian eta Azpeitian ere jarri dute martxan herritarrak heriotzaz hausnartzera eta pentsatzen dutena plazaratzera bultzatzeko egitasmo bana; Azkotian udalak antolatuta, Azkoitia Lagunkoiarekin eta Azkoitiko Death Cafe saioen sustatzaile Maider Etxeberriarekin elkarlanean, eta Azpeitian, Death Cafe saioen bueltan elkartzen diren hainbat lagunek antolatuta, udalaren laguntzarekin.
Azkoitian, “Hil aurretik nahi dut…” eta “Oroimenean” dioten bi arbel zintzilikatu zituen udalak ostiralean Azoka Plazan, eta herritarrek larunbatera arte izango dute beren ekarpenak egiteko aukera. Azpeitian, berriz, “Hil aurretik nahi dut…” dioen arbela jarri dute Azokan Plazan, eta han ere aste osoan idazteko aukera izango dute herritarrek.
