Herri kirolari azkoitiarra izan zen onena txingekin; Aimar Galarraga oriotarra, aldiz, hirugarren sailkatu zen. Asteasun (Gipuzkoa) jokatu zituzten atzo, larunbata, Gipuzkoako gizonezkoen orga txapelketa eta txinga eroate txapelketak, gizonezko eta emakumezkoetan.
Goenatxo III.a, erdian, txapela jantzita. (Argazkia: Tolosaldeko Ataria) Jon Unanue Goenatxo III.ak Gipuzkoako txinga eroate txapelketa irabazi zuen atzo, larunbata, Asteasuko (Gipuzkoa) Usarrabi pilotalekuan. Gizonezkoen maiako Gipuzkoako orga txapelketa eta gizonezkoen nahiz emakumezkoen txinga eroate txapelketak jokatu zituzten Asteasun.
50 kiloko txinga eroate txapelketa jokatu zuten, eta irabazleak hamabi plaza, zinta bat eta 0,90 metro egin zituen, txapeldunorde gelditu zen Jabier Urrestik baino zinta bat eta 0,90 metro gehiago, hain zuzen. Aimar Galarraga oriotarra hirugarren sailkatu zen, lau plaza eginda.
