Duela hamasei urte inguru, Astin futbolean aritzen ziren nerabe batzuek futbolaz harago zihoan zerbait elkarbanatzen zutela ikusi zuten. Antzeko ezinegonak zituztela eta, erdi txantxetan, musika taldea sortu behar zutela iradoki zuen haietako batek; hasierako txantxa hura espero baino serioago hartu, eta lokalean entseatzen hasi ziren. “Inork ez genuen ia ezer jotzen, bateriak izan ezik”, oroitzen du taldean hasieratik dagoen Iker Iñigo Antxus-ek. “Lehenengo ideia eduki genuen, eta gero egokitu egin ginen ideia horretara; instrumentuak lortzen eta horiek nola jo asmatzen hasi ginen”.
Garai hartan bateriak, baxuak, gitarrak eta bi ahotsek osatzen zuten Skasti, eta handik hilabete gutxira sartu ziren tronboia eta tronpeta. “Hasieran abesti punkiak jotzen genituen, bertsioak, baina gero pentsatu genuen nahi genuela ska estiloa jo, eta horretarako behar genituen metalezko instrumentuak”. Orduan batu zen Mikel Alberdi taldera, tronpeta jotzera, Josu Gonzalez de Durana Tete tronboi-jotzailearekin batera. «”Hasieran bagenekien ez genuela oso ondo jotzen, eta geure buruari askotan egin diogu barre”, azaldu du Alberdik.
2010aren bueltan bolada betean ziren Euskal Herrian ska taldeak. Skasti, berriz, hazten ari zen pixkanaka. “Joxe Ripiau eta halakoen erreferentzia ere asko gustatzen zitzaigun, eta kuadrillako Ituk [Aitor Iturralde] soinu handia jotzen zuenez, hura ere taldera batu zen”. Gisa horretan, behar eta nahi zutenera egokituta eta lagun giroan jardun du Skastik urte hauetan guztietan. Zortzi kidek osatzen dute gaur egun taldea: Mattin Saldiasek gitarra jotzen du, Ander Izagirrek baxua, Gorka Mendizabalek bateria, Aitor Iturralde Itu-k teklatua, Tetek tronboia, Mikel Alberdik tronpeta, eta Xabier Uzin Bino eta Antxus dira abeslariak.
Etengabe egokitzen
Taldea bere ibilbidean “dinamikoa” izan dela dio Antxusek. «Musika erreferenteak aldatu izan zaizkigu; kideei dagokienez, hasierako hiru gaude une honetan, eta gerora sartutako beste batzuek ere utzi egin dute». Entseatzeko ere hamaika leku izan dituzte, eta unean uneko egoerara egokitzen aritu dira urtez urte.
Hamasei urteko ibilbidean denetik ezagutzeko aukera izan dute zarauztarrek. Lau disko atera dituzte, hamaika kontzertu eskaini txoko ugaritan, eta 2013an Gaztea Maketa Lehiaketa irabazi zuten. Hura “olatuaren kresta” izan zela dio Alberdik, eta orduko oroitzapen oso ona dute. Zarauztik autobus bat joan zen Bilbora, maketa lehiaketako finalean jo zuten kontzertua ikustera.
Oraintsu, ordea, erabaki irmoa hartu dute. Duela hiru aste inguru iragarri zuen Skastik bere ibilbidearen amaiera, sare sozialen bidez. Iragarpenaren inguruan galdetuta, Antxusek eta Alberdik, biek diote bazekitela lehenago edo beranduago iritsi behar zuela une horrek. “Geratu ginen taldekide guztiok zerbait hartzeko eta mahai gainean jarri genuen gaia. Ez da erraza hau, gehienok musika afiziotzat daukagulako”.
Orain arte musika eta laguntasuna izan dira taldea batuta mantendu duten zutabe trinkoak, baina denborak aurrera egin ahala, gero eta zailagoa da horiei eustea. “Jendeak lana, bestelako proiektu eta konpromisoak ere baditu, eta horregatik hartu dugu erabakia”, dio Alberdik. Antxus ere bat dator taldekidearekin: “Urte mordoa daramagu honetan, eta ikusi dugu naturalki, oso ondo pasatu dugula, baina egin dugula egin beharrekoa”. “Energia asko eskatzen dizu horrelako proiektu bat edukitzeak. Eta energia hori ez zegoen. Erdizka jarraitu baino, uztea hobe zela pentsatu genuen”, azaldu du Alberdik.
Atzera begiratuta, Skasti bigarren familia izan dela garbi daukate bi musikariek. Nabarmendu dute zenbat jende eta leku ezagutu dituzten taldeari esker, eta badakite urte batzuk barru taldea maitasun handiz oroituko dutela. Orokorrean, oso ibilbide “oparoa” egin dute Antxusen aburuz. Amaitzearen aldeko hautua egin izana gogorra izan zen Alberdirentzat: “Erabakia hartuta zegoen, baina behar izan nuen denbora bat barneratzeko”.
Azken notak
Erabakiak erabaki, garbi zeukaten zuzenekoak eskaintzen nahi zutela itxi taldekide guztien bizitzetan pisua izango duen Skastiren atala. “Presarik ez geneukan bukatzeko”. Erabakia 2019an hartu zuten, baina pandemia iritsi zen eta atzeratu egin dute albistea iragartzeko unea. “Isilean mantendu dugu erabakia orain arte eta, egia esan, ez da oso erraza izan”.
Ibilbidearen amaiera iragartzeaz gain, beste bi abesti eta azken bira egingo dituztela jakinarazi zuten zarauztarrek. Bi horietako bat dagoeneko entzungai dago plataforma digitaletan: Zer gertatu zaigu. Azken birari dagokionean, taldekideen asmoa da 2022ko martxo inguruan hastea kontzertuak ematen, eta udazkenean amaitzea. Kontaktu batzuk eginda dituzten arren, ez dute oraindik ezer lotuta, eta «irekita» daude.
