Atzo iluntzean egin zituzten elkarretaratzeak kostako bi herrietan. Egun batzuk lehenago, Azkoitian eta Azpeitian ere salatu zuten Sara Pina tuterararren hilketa. Astelehenean aurkitu zuten haren gorpua indarkeria zantzuekin, eta senarra Frantzian aurkitu eta atxilotu zuten.
Zumaian Saregileen plazan egin zuten elkarretaratzea dozenaka lagunek (Maria Maya Manterola).
Astelehen goizean, 38 urteko Sara Pinaren gorpua aurkitu zuten Foruzaingoak eta suhiltzaileek Tuteran, Iruñea pasealekuko etxe batean. Labanaz egindako zauriak zituen hilotzak sabelaldean. Emakumearen senarra izan da hasieratik susmagarri nagusia, eta Boisredon herrian (Frantzia) atxilotu zuten asteazken eguerdian. Ikerketaren tesi nagusia da senarrak hil zuela emakumea, baina Tuterako epaitegiak ikerketa sekretupean jarri du.
Egun hauetan, Euskal Herriko hainbat herri eta hiritan salatu dute hilketa matxista hori. Zumaian eta Zarautzen, esaterako, atzo iluntzean egin zituzten elkarretaratzeak –Orioko mugimendu feministak bertaratzeko deia egin zuen–, eta Azkoitian eta Azpeitian, egun batzuk lehenago atera ziren kalera herritarrak.
Zarautzen udaletxe aurreko plazan bildu ziren (Mireia Galarza Bastida).
