Auzoko irisgarritasuna hobetzeko lanak hasi ditu Azpeitiko Udalak Arana Goikoa auzoan, eta laster auzo horretako ur hoditeria, estoldak eta espaloiak berritzen hasiko da Gipuzkoako Ur Kontsortzioarekin elkarlanean. "Arana eta Arana Goikoa auzoen artean igogailua jarri ostean, Arana Goikoa auzoko irisgarritasuna hobetzeko obrak egitea adostu zuten auzotarrek eta udalak, eta dagoeneko martxan dira", esan du udalak. Orain hasi dituzten lanak Arana Goikoako 17 eta 18 zenbakidun atarien artean irisgarritasuna hobetzeko dira. Art eraikuntza enpresa ari da lanean, eta hiru hilabeteko epean bukatzea dute aurreikusita. Lan horien aurrekontua 130.403 euroko da.
Udalak aurreratu du, Arana Goikoa auzoko 11 zenbakidun etxe atariko irisgarritasuna hobetzeko proiektua lantzen ari dela, auzokoek hala eskatuta.
Ur hoditeria eta espaloiak
Arana Goikoa auzoan irisgarritasun hobea izateko obrez gainera, ur hoditeria, estoldak eta espaloiak berritzeko lanak ere egingo ditu Azpeitiko Udalak, Gipuzkoako Ur Kontsortzioarekin elkarlanean. Bi erakundeen arteko hitzarmenaren baitan egingo dituzte lan hauek, irailaren bukaeran hasita. 445.744 euroko aurrekontua izango dute, eta hiru-lau hilabeteko epean hasi eta bukatzea aurreikusi dute.