Datorren astean hasiko dira ofizialki Sanjuandegiko festak, baina haurrak eta gaztetxoak gaur hasi dira jaietan murgiltzen. Urtero legez, Umeen Egunaz ari dira gozatzen gaur, zapatuarekin.
Eguraldia lagun, 12:00etan elkartu dira dozenaka ume eta begirale Jose Antonio Agirre plazan, eta taldeetan banatuta, horiek askotariko jolasak egiteko parada izan dute, baita aurpegia margotzekoa eta urez blai egitekoa ere.
14:00etan sabela betetzeko tartea izango dute; izan ere, Jose Antonio Agirre plazan bertan bazkalduko dute umeek. Bazkalondoan, jolaserako tartea izango dute gaztetxoek, eta 15:00etan elkartuko dira gurasoekin. Dena den, Umeen Eguneko egitarauaren barruan izango da beste ekitaldi bat ere: Julen magoak ikuskizuna eskainiko du Jose Antonio Agirre plazan.