Errezilgo San Martin Herri Eskolako guraso elkarteak, udalaren laguntzarekin, Pazko Asterako haur eta gaztetxoentzako ekintzak antolatu ditu aurten lehen aldiz, Inguru Abentura enpresarekin.
Hain zuzen ere, bi eguneko kanpaldiaz gozatu zuten joan den ostegunean eta ostiralean 6 eta 13 urte bitarteko herriko 35 umek eta gaztetxok. Eguraldi euritsua tarteko, eskolan edota pilotalekuan egin behar izan zituzten ekintza guztiak, aterpean, baina bai parte hartzaileak, bai antolatzaileak, gustura gelditu dira esperientziarekin.
Puzgarriak, tailerrak, kirolak, magia... Askotariko ekintzak egin ahal izan zituzten kanpaldian, eta eskolako gimnasioan egin zuten lo elkarrekin.