Talai-Mendi trail lasterketaren hirugarren edizioa jokatu zuten atzo Orion eta gutxigatik ez zituzten etxekoek irabazi emakumezkoen eta gizonezkoen lasterketak. Sara Peña herriko korrikalaria onena izan zen bere kategorian eta Ibai Makazaga bigarrena berean. Edonola ere, nagusitasunez irabazi zion Gontzal Murgoitio elorriarrak.
Murgoitio zen, hain justu, lasterketa irabazteko faboritoa eta orain arteko marka hautsi zuen helmugan; izan ere, Makazagak berak lasterketaren lehenengo edizioan egindako denbora minutu bat eta zazpi segundoan hobetu zuen. Elorrioko korrikalariak ordubete baino gutxiago behar izan zuen lasterketa egiteko (58:37). Makazagak, berriz, ordubetean amaitu zuen 14 kilometroko ibilbidea (01:00:26), oraingoan. Minutu bat eta 49 segundo atera zizkion Murgoitiok. Gizonezkoen podiuma Lazkakoko Beñat Bereziartuk osatu zuen (01:03:23).
Emakumezkoetan, Sara Peña etxeko korrikalaria gailendu zen, esan bezala, eta gustura hartu zuten bizilagunek txalo artean. Gainera, Orioko Arraunketa Elkarteko elastikoa jartzeko astirik ere izan zuen Peñak helmugan. Ordubete eta hogei minutu baino gutxiago behar izan zituen ibilbidea egiteko (01:18:26). Hala, ia 5 minutuko aldea atera zion bigarren sailkatuari, Amaia Eskisabel donostiarrari (01:23:18). Hirugarren, berriz, Zutoia Odriozola helmugratu zen (01:25:43). Elorriarra hura ere. Guztira, 247 lagunek hartu zuten parte.