Elena Rikondo gizarte langilearen hitzetan, "herritarrekin batera" egin dute protokoloa idazteko bidea, eta Farapi elkartearen laguntzarekin: "Talde feministak eta gainerako eragileak gonbidatu genituen, herritarrekin batera egin nahi genuelako lana eta ez genuelako nahi instituzioen proiektu bat izatea eta herritarrengandik urrun geratzea". Aurkezpenetan iradoki nahi izan dute gertutasun hori, kalean bertan plazaratu baitute lanketa.
Indarkeria zeri deitzen zioten definitzea izan zen lehenengo pausoa. Indarkeriaren definizio komuna adostea, alegia: "Zertaz ari gara hizketan? Zer da indarkeria matxista? Gure gizartean daukagun arazo handienetakoa da indarkeria matxista, eta azken urteetan, bereziki mugimendu feministaren lanari esker azaleratu da. Hasierako lanketa horretan ere, asko jardun genuen mikromatxismoaren gaiaz". Gero, saioak egin zituzten herrietako medikuekin, Ertzaintzarekin, epaitegietako langileekin, abokatuekin, indarkeria jasandako emakumeekin... Rikondok azaldu duenez. Saio haietan zehaztu zuten gaia nola landu, eta triptiko "xume" bat izan da emaitza.
Triptikoa "oso bisuala, hitz gutxikoa eta telefono bakar bat zuena" izatea nahi zuten, eta, horrekin batera, bideo bat ere osatu dute, triptikoa etxez etxe banatu ondoren zabalduko dutena. Ikus-entzunezko hori bide desberdinetatik zabalduko dutela azaldu du Rikondok. Gainera, "kolektibo desberdinetara" iristeko asmoz, hainbat tokitan landuko dute protokoloa: "Herri eskolan landuko dute, aisialdi zerbitzuaren bidez ere jorratuko da gaia, eta ahalik eta kolektibo gehienengana iristeko lan egingo dugu".
"Herritarrekin egin dugu, ez genuelako nahi herritarrengandik urrun geratzea"
Rikondoren arabera, zaila izaten da herrietan indarkeria kasuak badirela onartzea, eta ikusgarritasun hori lortzeko bidean pauso garrantzitsua izan da protokoloa lantzea. Gizarte langilea "pozik" dago herritarrekin batera egindako lanarekin: "Nik ez nuen aurrez halako lanik egin, eta are gutxiago horrelako gai bat lantzeko. Kalean gaiari buruz hitz egitea pauso handia da".
Indarkeria matxistaren aurka egiteko tresna bat edukitzea zen helburua, baina lanketa "aitzakia ederra" izan da herritarrekin komunitatea osatzeko ere: "Hori izan da helburu garrantzitsuena".
Azaroaren 8an dira berriz ere elkartzekoak, indarkeria matxistaren inguruko datuak eskuen artean dituztela. Azaroaren 25aren inguruan zer antolatu adostuko dute, bide batez. Talde horri jarraipena ematea gustatuko litzaieke datozen hilabeteetan ere: "Jendea aktibo mantendu nahi dugu, baina ikusiko dugu zer ateratzen den. Esfortzu handia egin da, baina jendea mugitzen ari da".