Bertsoa eta pilota lotzen dituen Udaberri Torneoa bukaerara iritsi da, bihar jokatuko dute finala, 19:00etan hasita, Beasaingo Antzizar pilotalekuan. Hiru pilotarik eta bertsolari banak osatutako lau taldek parte hartu dute txapelketan. Maiatzaren 5ean hasi zuten Udaberri Torneoa, eta sei jaialdik osatu dute txapelketa. Naroa Agirre arroarrak eta Oihana Orbegozo azpeitiarrak talde berean jokatu dute txapelketa, Iturriaga pilotariarekin eta Aitor Sarriegi bertsolariarekin Kukuprakak taldea osatuta, eta finalerako txartela lortu dute. Bitxiloreak taldearen (Etxebeste, Etxekolenea eta Ruiz de Infante pilotariak eta Nerea Elustondo bertsolaria) kontra jokatuko dute bihar.
Finalerako sarrerak bost euroan salduko dituzte, eta haurrek doan sartzeko aukera izango dute. Finala bertatik bertara ikusi ezin dutenentzat Berria.eus-en eta Hamaika telebistan zuzenean eskainiko dute.