Datorren ostegunean, ekainaren 1ean, emango diote hasiera aurtengo hondartza denboraldiari, eta egun horretatik aurrera martxan izango da sorospen zerbitzua, aurreko denboraldietan baino hamabost egun lehenago. Sorospen taldearekin batera, hondartzako zerbitzu guztiak jarriko direla abian lehen egunetik jakinarazi du Zarauzko Udalak; hau da, toldoak, doako komunak eta dutxak, eta hondartzaren inguruko guneen garbiketarako errefortzua.
Azken urteetan bezala, BPXport XXI enpresa arduratuko da sorospen zerbitzuaz. Egunero, 24 sorosle, hondartzako buru bat, itsas motorretako bi patroi, anbulantzia gidari bat eta erizain bat egongo dira bainularien segurtasuna bermatzen. 11:00etatik 20:00etara. Hondartza sei bainu eremutan banatuko dute, eta ohi bezala, moilako bainu guneak ere soroslea izango du.
Hondartza denboraldia aurreratzeaz gain, Zarauzko Udalak nabarmendu du alor honetan eskainitako zerbitzuak "hobetu" egin dituela urtez urte. Emandako datuen arabera, sorospenera bideratutako aurrekontua 535.834 eurotik 839.970,80 eurora igo dute azken bost urteetan. "Honi esker, alde batetik, hondartza zaintzen duten sorosle kopurua eta bainu guneak gehitu dira eta, bestetik, Zarauzko hondartzan dagoen zaintzapeko bainuaren ordutegia ere zabaldu da", zehaztu dute.