Larunbatean abiatuko dute Erremontari Herriz Herri txapelketa Aizarnazabalgo Atari Soro pilotalekuan. 17:00etatik hasita, binakako bi partida ikusteko aukera izango dute pilotazaleek: lehen partidan, Segurola eta Gurrutxaga aizarnazabaldarrak izango dira aurrez aurre; Segurolak Apezetxearekin osatuko du bikoa, eta Gurrutxagak, berriz, Zaldua I.arekin jokatuko du. Halaber, bigarren norgehiagoka bat ikusteko aukera ere izango dute larunbatean Atari Sorora joaten direnek: Ansa II.ak eta Azpirozek Ezkurra II.aren eta Barrenetxea IV.aren aurka jokatuko dute. Bi partidetan bi set jokatuko dituzte hamabost tantora, eta hirugarrena, zortzi tantora.
Gainera, antolatzaileek jakinarazi dute maiatzaren 16an Galarretan grabatuko den Erremontari telesailaren grabaketa zuzenean ikusi nahi duten aizarnazabaldar guztiek doako sarrera izango dutela.