Herritarrek dituzten beharrak kontuan hartuta, etxebizitzaren eskaintza berritzeko lanean ari da Azpeitiko Udala, Nagore Alkorta Azpeitiko alkateak nabarmendu duenez. Horri lotuta, gazteen emantzipazioa errazteko eta Alde Zaharra biziberritzeko asmoarekin bost etxebizitza eraikin erosi ditu udalak, horiek berritu eta alokairu sozialera bideratzeko gero.
Alde Zaharra biziberritzeko helburuz aurretik hasitako bidea segitzen ari da udala bost eraikin horiek erosita, hala nabarmendu du Alkortak. Gogora ekarri ditu Done Jakue kalean apaiz etxea zenean eraikitako etxeak, Elizkalean eraikitzen ari diren etxebizitza tutelatuak eta Buztinzuriko Errebalean eraikitzen ari direnak.
Udalak Alde Zaharrean erosi dituen bost eraikinetatik lau Elizkalean daude, etxebizitza tutelatuak eraikitzen ari direnaren segidan. Udalak azaldu du, lau horietatik bi eraikin dagoeneko eraitsita daudela, eta segidako beste bi erosita dituela erakundeak. Horietan, alokairu sozialerako hamasei etxebizitza egitea aurreikusita du udalak, eta horretarako, Eusko Jaurlaritzako Lurralde Plangintza, Etxebizitza eta Garraio Sailarekin elkarlanean ari da.
Alde Zaharra biziberritzeko bertako etxebizitzak berritzea "estrategikoa" dela iritzi dio Alkortak, eta Alde Zaharra "bizigarriagoa eta erakargarriagoa izan dadin" neurri ezberdinak hartzen ari direla nabarmendu du: "Etxebizitzen eraikinak berrituz eta babestutako etxebizitzen eskaintza bertan egiten ari gara. Behin etxebizitza berri horiek egindakoan, babestutako 40 etxebizitza berrituta izango dira Alde Zaharrean".
Alde Zaharrean Goikokalen 2. zenbakia duen eraikina –udaletxearen segidakoa- ere erosita du udalak. Toki horretan, gizarte babeserako alokairuko lau etxebizitza eraikitzea aurreikusita du erakundeak. "Gaur egun, gizarte beharrak aztertzen ari da udala etxebizitza horien izaera zehazteko".
Gazteentzat aukerak
Alde Zaharra biziberritzearekin batera, gazteen emantzipazioa errazteko aukerak eman nahi ditu udalak. Beraz, Esklabetan eraikitzen ari diren alokairurako etxebizitza eskaintzari Alde Zaharrekoak gehitzeko asmoa du udalak, hala adierazi du alkateak: "Gazteen emantzipazio adina atzeratzen ari da, eta horri aurre egiteko eta etxebizitza duinak prezio eskuragarrietan eskaintzeko modua egin nahi dugu. Alokairu sozialeko etxebizitzen bidez lortu dezakegu hori, eta Esklabetan eraikitzen ari garen alokairu sozialeko 48 etxebizitzak urtearen bukaerarako amaituta izatea aurreikusten da". Eskaintza horri segida Elizkalean eraiki nahi dituzten hamasei etxebizitzekin eman nahi diela gaineratu du Alkortak.