Dantzari Txiki Eguna ospatuko dute igande honetan Getarian. Gure Txeru elkarteak antolatutako jaian herriko dantzariek parte hartuko dute, nola ez, baina baita eskualdeko eta Gipuzkoako beste hainbat taldek ere: Zarauztik etorriko da dantza talde bat, eta Debatik, Usurbildik, Lezotik eta Oiartzundik ere talde bana etorriko dira.
Dantzarien kalejira 11:15ean hasiko da Sahatsaga Goian, eta herriko kaleetan zehar hainbat saio eskainiko ditu talde bakoitzak. 13:00etan, berriz, talde guztiak frontoian elkartuko dira dantza emanaldia eskaintzeko. Elkarrekin bazkalduko dute Sahatsagan 14:00 aldera, eta eguna amaitzeko, erromeria egingo dute plazan, 16:00etatik 18:00etara, Elizagoien ahizpekin.