Gure Txeruk zabaldu du izena emateko epea pilotako XXVI. Salbatore Txapelketarako, eta epe hori larunbat honetan amaituko da, hilak 20. Txapelketa kadete (2008-2009), jubenil (2006-2007) eta 23 urte azpikoentzat (2001 arte, hori barne) izaten da, eta maiatzaren 6an izango du hasiera. Finalak, berriz, abuztuaren 6an jokatuko dituzte, ohi bezala, Salbatore jaien bueltan.
Klub bakoitzak nahi adina bikote aurkezteko aukera izango du maila bakoitzean, eta izena ematerakoan zehaztu beharko dute pilotari bakoitza zer urtetakoa den. Izena telefonoz eman daiteke 688 86 38 60 zenbakira deituta (Xabier Etxaniz), edo korreo elektronikoz, mezua etxanizgetaria@gmail.com helbidera idatzita.
Egutegia eta arauak
Partidak astelehen eta asteazkenetan izango dira maiatzean, 18:30ean hasita, eta ekain erditik aurrera, baita larunbatetan ere, 18:00etan hasita.
Arauei dagokienez, kanporaketa bidezko txapelketa izango da, eta partida jokatu behar duen bikoteak azken orduko bajaren bat izango balu, klubak berak bilatu beharko du ordezkoa (edo ordezkoak, bi pilotariak baldin badira baja). Bestela, bikote hori txapelketatik kanporatuta geldituko da. Jakinarazi dute ondoren bikote titularrak ala ordezkoak jarraitu ahalko lukeela txapelketan.