Bi urteko geldialdiaren ondoren, Zarauzko kaleetara itzuli da berriz ere Erdi Aroko azoka. Herriguneko oinezkoentzako kaleak apaingarriz jantzi, eta aztiz, juglarez, bufoiz nahiz goliardoz bete dira.
Askotariko postuak zabaldu dituzte saltzaileek, 90 inguru. Eguraldia lagun, jende ugari gerturatu da Alde Zaharreko kaleetara, eta eskuz egindako bitxiak, denetariko jakiak nahiz kosmetikoak erosi ahal izan dituzte baita musika emanaldiez, tailerrez eta ipuin kontaketez gozatu ere.
Desfile nagusia, ostegunean
Etzi, osteguna, desfile nagusia egingo dute musika talde, antzezle eta saltzaile guztiek; goizez eta arratsaldez egingo dute, 10:30ean eta 17:00etan. Desfilea Geltoki kaletik irtengo da eta Alde Zaharreko kaleetan zehar ibiliko dira. Azokak egunero irekiko ditu ateak 11:00etatik aurrera, eta egun osoa egongo da zabalik, egitarau oparoarekin.